شعر- الهيلم زايد المويس ..
مانرخص الغالي ولو كان ماكان
إلا ليامنـه تجاهل غلانا
ترجمت لك صدق المشاعر بقيفان
لعلها تاصل مشــاعر هـوانا
تقديرها عندك لقى نوع نقصان
والنقص من يرضاه لاأنتم ولاأنا
الصد يجزى بصد في طبع الإنسان
إلا مـع الارحام ربـي نهانا
اللي يتناسانا يجازى بنسيان
اللي يتناسانا ولو مانسـانا
اللي مقفي جعل ماشاف الاحزان
ليامنه اقفى مانكسربه عزانا
بالدرب لابانت علامات خذلان
لو ودنا نمشيه عافت اخطانا
يللي تهجانا من العام للآن
صفحاتنا بيضٍ وكلٍ قرانا
مباديٍ تبقى على مر الازمان
ماتنمحي عند الزمن لو محانا
اللي يبادلنا المشاعر بعرفان
مانبيع من هو بالموده شرانا
ولانطرد المقفي ولوكان ماكان
العزة أغلى يامرخّص غلانا
