شوف لك صرفة

شعر: محمد آل مبارك- البحرين

ماني على ما يرام و(شوف لك صرفة )
‏خلك معي .. طول وقتي لا تخليني
‏اسجني وياك ..حتى لو بـ نص غرفة
‏قربك عن الكون يغنيني ويكفيني

وإن كنت خايف عليّ من شي ما عرفه
فالخوف من غيبتك والله معميني
خليتني مثل منهو يتنظر حتفهأا
أراقب الموت وغيابك يدنيني

ارفق عليّ ما دريت إن غيبتك صلفه؟!
وإن الهجر سم، كيف السم يشفيني؟!
الحال ماله وصوف شلون باوصفه؟!
يكفي من الوصف، (قلبي منكسر فيني؟)

ألوان وجهي لها يومين منخطفة
أرجوك تعفيني مْن الوصف تعفيني
يا ليت لي قبال شرفة غرفتك شرفة
يمكن يبيّن عذابك فيّ وتجيني

خلص من العمر نصفه وأنت لك نصفه
يا ترجع نْعيش والا تْرجّع سنيني
ماعاد باقي عمر بفراقنا نْصرفه
محتاج باقي العمر لوصال يحييني

لو كل عاشق رمى هجره على ظرفه
ماظن تلقى من العشاق عشريني!