ناعم الريش

شعر-أحلام
خصت الشاعرة أحلام صفحة(ملامح صبح) بقصيدتها الجديدة(ناعم الريش). وندعوكم لمشاركتنا قراءتها حيث تقول:
يرجف بصدري ناعم الريش ملهوف
ودّه يطير ويابس الضلع لـدّه
يكفخ بجنحه ضايقٍ حوله الجوف
يجرح جدار القلب لحظة يهدّه
والله لولا عوج الأضلاع مصفوف
يمدي تفرّق من همومن تشدّه
ياطير قول لصاحبي يحن ويروف
بالوصل والأشواق كفّه يمدّه
من كان له محبوب مبعد عن الشوف
وش له يعيش العمر وإلا يعدّه
وأرجوك قلّه عمرنا شويّ ويطوف
لايضيّعه مابين هجره وصدّه
بين المحاني يرقد القلب متلوف
مجروح يشكي من ضروفٍ تحدّه
لامن طراله طاري الهمّ والخوف
ودعته الله … والأماني بيدّه