مسافة ظل

شعر- خالد الطويل
يارب ساعدني على كفّتْ يدي
لو حاجتي عند العرب موجوده
صبرٍ على ضيقٍ اعانيه وحدي
اعز من مدت يدٍ محدوده
بواجه ظروفي على قد جهدي
واصبر مدام العاقبه محموده
اخاف من شيٍ يكدر مرقدي
صدت رفيقٍ ما حسبت صدوده
ولا ظني امضى من حسام المعتدي
الاّ تخلي من هقيت صموده
وقت الرخى كلٍ يناديك بعدي
وان شح وقتك ثار بك باروده
لا تامن الدنيا ولو جاتك عدي
ياكثر مافارق سعيد سعوده
واللي هقيت انه بعيدٍ كالجدي
مابين حجانك تحس شهوده
مايفرق اقصايه عن اول مولدي؟
الا مسافة ظل فارق عوده
ماكني الا أمس بالحلم ابتدي
من كثر ما ايام العمر معدوده
يالله عن فعلٍ يشمت حاسدي
ذكرٍ يخلد سيرةٍ منشوده