شوقتني للغزل والشعر شوقتني
يابو جبينٍ كما برقٍ سرى في الظلام
توهتني في بحور الشعر واغرقتني
واللي بقلبي مشاعر فوق كل الكلام
غنيت بيتين منها وانت سابقتني
ومن يوم غنيتها غنى وطار الحمام
أنا اشهد إنك بحبل الود وثقتني
وثقني أكثر وسميني أسير الغرام
مادام غامرت بيدينك وطوّقتني
واسقيتني شربةٍ حسيتها في العظام
أحلى من الشهد كانت يوم ذوقتني
ياكيف خمرٍ يزيل العقل ماهو حرام
أسقيتني كاس من خمرك وعلقتني
لاني بصاحي ولاني غارقٍ في المنام
يومين يادوبها من يوم فارقتني
يومين عندك وعندي كل يومٍ بعام
لوشفت حالي بعد فرقاك صدقتني
من غير لااحلف يمين ولايجيني ملام
تعال ياللي بنار أشواقي أحرقتني
شف ويش سويت في حالي ورد السلام
خليني أعيش حلمي ليش فوقتني!
يكفيني إني صحيت سنين بين النيام
