وين انت يالي في هواك اجتهادي
قلبي معك وانت على القلب ما احسنت
غرك هوا قلبي وسقت التمادي
أهواك وأنت بالهوى لي تمننت
مافي الهوى ياصاحبي حب هادي
نار إليا شبت بقلبك تجننت
نار لجل عينك تزيد اشتدادي
وانت مع نيران قلبي تعاونت
لو بك مثل مابي تصيح وتنادي
توقعي يا نار بالحب آمنت
أسهر مع نجم بها الليل بادي
ويقفي وانا بك تايه فيه ماذهنت
ويا هواجيس بها الفكر غادي
وين انت يارجواي ومناي وين انت
وقتي غدا ياصاحبي شيء عادي
وقت بدونك صاحبي له تشاينت
عفت الطرب عقبك وماعدت شادي
إلا ونين القلب لامن تونونت
لو بك هوى قلبي وجملة ودادي
لصويحبك في عالمه طعت واذعنت
غروك ناس همها بالتعادي
هروج عدوانك لها ما تيقنت
فيني وفيك اليوم شمت العوادي
ليتك سمعت هروجها بس ثمنت
واليوم أنا في وادي وانت في وادي
لا يا غشيم الحب .. للحب ما اتقنت
عيش الندم عقبى وهذا مرادي
وعقبك أنا للحب هونت هونت !
شعر / أنور عبد الغفور – الرياض
