بقلم: هناء عصام
يعنى قاسم سليماني قائد الحرس الثوري الايراني يقول و يصرح و يعترف فى مؤتمر شبابي بطهران من كام يوم ان ايران لها وجود ف بغداد وبيروت وصنعاء ودمشق وتسعي للسيطرة ع الاردن !! و بعدين تييجى ايران تقولك يجب احترام السيادة ف اليمن !؟!؟ لا يا شيخ !! اى استحمار للعالم ده ؟؟ عبيط انت ولا ايه يا كابتن ؟!؟!؟ عموما مفرقش كتير حلم الخلافة عن حلم التمدد الفارسى بتاع ايران ..اهى تورتة و كله بيتخانق عليها و عشان كده كان لازم العرب يتفقوا و يفوقوا ! و ياريت محدش يقولى طب و احنا مالنا بحدود السعودية والخليج.. ولا يقعد يخبطلنا ع الترابيزة ليه مصر تشارك ..واضح يا حبى انك كنت بتسقط ف الجغرافيا ..راجع خريطة العالم العربى و شوف يا اخ فين باب المندب من قناة السويس و فين قناة السويس من مصر و فين مصر من ليبيا و فين ليبيا من تونس و فين تونس م الجزائر الخ الخ !! يابنى كلنا منفدين على بعض .. يعنى يانعيش سوا يانموت سوا !! وشكلنا كده اخيرااااا…..اخترنا نعيش !! قول يارب
******
و على هامش فعاليات حياتنا عندى سؤال معلش هو مين اللي ف ايده يمنع الاعلانات بتاعة شاي دكتور بينج بونج واللاصقة السحرية لعلاج المفاصل و الروماتيزم والسكر و الضغط و القلب !!! و مستخلص زيت البانجو لصحة شعرك سيدتي ومسحوق دموع الاسد الحزين لفحولتك سيدى !!و الكمبيوتر ابو 499 جنيه اللى معاه مفاجأة ماوس و موبايل سامسونج اس فايف هدية !!و مفاجأة جروب تفاحه لكل عملائها كريم النسر الدهبى لنفخ الوجه وتبييض الاسنان وتصغير الانف و نحافة الخصر و تصليح ساعات و غسيل المواعين ؟؟
وكل ده بنمر تليفونات و عناوين و تفاصيل حياة النصاب عادى جدااااا !!! ايه بقى ؟؟؟
• إعلامية بالتلفزيون المصري
