هذه قصيدة قذف بها – النت – الذي اصبح يحمل الكثير من جميع الالوان ولانها تحمل شيئاً من الماضي رأينا ان نشرككم معنا في التمتع بها.
قصيدة حجازية
أسعد يوشوش أبوه يبغى هدية
ماشاء الله نجح واتخرج من الثانوية
أبشر ياولدي بس تجي فلوس الإكرامية
ولايهمك يبويا مافي مشكلة حصبر شوية
ياواد عباس إيشبها كدا رجلك ملوية؟
دخلت فيها قزازة يبويا من العصرية
تاني مرة فتح عينك لا أخرملك هيه
ولا اشوفكم تلعبو حفايا
ترى تاكلكم ام العباية البنية
بدرية: يبويا فين حتودينا هادي الصيفية؟
والله يابنتي كالعادة، الطايف حي البخارية
الله يسعدك يبويا نبغى أبها البهية
يابنتي أبها بعيدة مرررررة وسفرية
خلاص اللي تشوفو يا أغلى
أب في الدنيا ديه
بنت ياعلوية، ناوليني
الكمر حقي والسديرية
أنا خارج دحين ياخيرية رايح الشامية
أودي صك الوقف حق بيت السليمانية
خلي الأولاد يسبقوني للحرم تحت المكبرية
عشان نصلي العشا ونكسب الفرض سوية
بعد العشا وفي السطوح عند المشربية
خيرية تفت العيش في الحليب
وبدرية مسلقحة متحنية
هاتي ياعلوية الجبنة البلدي
والحلاوة الطحينية
وكمان كم بيضة نسوي
شكشوكة في الصينية
لمة حلوة وظريفة وعيلة عفوية
أتعشو وعليهم بالخير يدوروا عالناموسية
عشان يصحو بدري مع أدان الفجريه
ولا تسألوني مين كتب القصيده ديه
لأنها بصراحه جاتني هديه
يسعد اهل مكه واهل جدة و المدينة
أهل الهرجه الحجازية
