بعد فرقاه

لاتنبش جروح المحبيـن ياصـاح
خل الجروح اللـي دفينـه دفينـه
القلب خزنة جرح وحكـاك مفتـاح
بشيب راسك لو فتحـت الخزينـه
اصفق بكف الصبر في خد الاتراح
مثل البحر يصفق بخـد السفينـه
من قال لي مرتـاح ابقول مرتـاح
اقولهـا ودمـوع عينـي سجينـه
ومادام حلق الحكي قدله تنحناح
فالحكي شين وطولة الصمت شينـه
بعطيك قصة حزن وهموم وإجـراح
قصـه حزينـه والنهايـه حزينـه
قدلـي ثلاث سنيـن والبـرق مـالاح
من قال وينه قمت اجاوبـه وينـه
جتني الخساره من قبل جني الارباح
وعلاقتي بالحزن صـارت متينـه
عشقت لي روحٍ ماهي مثل الارواح
روح ٍ ملك روحي براحـة يدينـه
الصاحب اللي طلته مثل الاصبـاح
اللي بناله فـي ضميـري مدينـه
هذا الفضاء من غيبته صاير اشباح
وفي حضرته كل المواجـع رهينـه
سوالفه لامن حكى عطرهـا فـاح
يسكن وسط عيني ونا وسط عينـه
راح وتركني برض الاوهام فـلاح
صـد وتركنـي للعنـاء والغبينـه
الصد مشرط حب والبعـد جـراح
والقلب جـور البعـد زود حنينـه
دمعي بعد فرقاه ياصاحبـي طـاح
والدمع مانفـع العيـون الحزينـه
***
شعر / فيصل آل فروان الوعيلي