شعر- ناصر العتيبي
القلب بين المطرقه والسنادين
والليل عيني ماتنامه قريره
يامال فرقا العين يادمعة العين
تساقطت مني ندامه وحيره
وتهاوت ابراج وتلاشت عناوين
اساميٍ كانت بعيني كبيره
صاروا ثلاثه بعد ماكانوا اثنين
اليوم في عيني صورهم صغيره
الله يبدلها من العسر ل اللين
هو ملتجانا في الظروف العسيره
سامع دعاء الصايمين المصلين
المطلع بالبينه والسريره
ياقاضي الحاجه وياقاضي الدين
ياالله لاتعمي البصر والبصيره
والصدر قبر الأوسمه والنياشين
لاصرت ماتملك سلاح وذخيره
كيف اتقلدها وانا خاوي ايدين
مافي يديّ الا قصيده اخيره
نحيل تلعب بي رياح الخماسين
واثبت على اقدامي وانا آبو منيره
ياصاحبي زعلت وأزعلت غالين
طولتها والا تراها قصيره
ليتك بعيد ونبتعد عنك مقفين
وتحول مابيني وبينك جزيره
اغيب عنك ايام وشهور وسنين
واموت والا تستمر المسيره
لكن ربطني فيك دم وشرايين
ايضا وتربطنا روابط كثيره
اسمى وأجل من ارتباط المحبين
والا علاقات العشير وعشيره
