شعر: لولو الحبيشي (قهريزيد)
قبل الكلام يحس في معنـاه وثيابـه تضيـق
قبل الدفا يحضن دفاك و ياخـذ لحضنـه دفـا
قبل الشروق يشوف نورالشمس وعيونه تفيق
قبل الغمام يـرف بأمطـار المـودة والوفـا
قبل اختيار الفقد لضلوعـي يولعهـا حريـق
قبل الطفولة واليتيم اللي على الحزن انكفـى
قبل الكثير اللي نسيته طاح في نص الطريق
قبل الكثير اللي أشيله لـك ولا أحسـه كفـى
قبل انكساري واختياري أتبع الخيط الرقيـق
قبل الامل واليأس وأحـلام المواجـع بالشفـا
قبل الدما تمشي مشاوير الغرام ومـا تطيـق
أحمولها والدرب وسط الريح ما عمـره صفـا
كنت الهوا اللي ما زفرته من تنفسته شهيـق
كنت الذهول اللي تشل أطرافه ثلـوج الجفـا
قبلي وقبلك قبل ينده من على الموت الغريـق
قبل ارتكاب الصبح جرم النور دنّق و انطفـى
