جدة.. التي نعشقها

السلام عليكم ورحمه الله وبركاته

السادة اهالينا واحبابنا البررة
رفقاء الدرب والعشرة
شوفتكم ترد الروح
وتزيل الهم والعبرة

لأنكم وجوه نيرة – وقلوب خيرة
وعائلات اصيلة – وسير جميلة
وتاريخ يسجل ، وانجازات لكم في كل محفل
وماضي عريق – وحب وثيق
وقرب وسكن وجيرة – وحكايات وصهر وسيرة
وانفاس معدودة – في اماكن محدودة
واجداد جاءوا ورحلوا ( رحمه الله عليهم )

واباء حملوا الامانة وما كلوا ( حفظ الله الاحياء ورحم وغفر للأموات منهم )
وابناء اعطوا بحب وما ملوا
ونحن ابتعدنا عنها ورجعنا
بقروب جداويون وله معني
الذي بالحب والطيبة يجمعنا
وفي حب جدة اللي :
نعشق شروقها وغروبها
وشوارعها وحواريها
وكل الطيبين فيها
نعشق بحرها وليلها
وحكايات في قلبنا نشيلها
ولما يضيق بينا الحال
نرجع لجدة نحكليها

نحكليها عن الساعات اللي عشناها بعيد عنها
وعن الشوق والآهات اللي في قلبي لها ومنها

تعرفوا .. تري جدة الأن تسمعنا
واليوم فرحانة بتجمعنا
وتدعي ربها وتقول
يا رب .. خير سمعنا
وتري :
جدة ماهي سور
وكورة ومينا وكنداسة
جدة مدينة عليها نور
واهلها بالحيل حساسة
وفلاحها ياما لعبت دور
وخرجت علماء مع ساسة

لأن جدة هي الأب وهي الام
وهي خالي وهي العم
وهي ( عيلة محترمة )
زي ما قال باديب العم
وفي جدة مراتع صبانا
وبدايات الحب وهوانا
وايام الصبا الاولي
وادعوا للي ربانا

وفي جدة .. خطوات اهالينا .. وبيوت قديمة تؤوينا .. ومهما شرقنا وغربنا .. تلاقيها ساكنه فينا
لكن مهما قصرنا – وفي حبها ياما اهملنا – نحمد ربنا انا – قدرنا اليوم ورجعنا
وجمعتنا هاذي دليل – علي انو ما بينا بخيل – في حب جدة وأهل جدة – لأن الحب فيها قليل

نرحب ونفتخر بيكم – لأنكم بين اهاليكم – هذا قريب وهذا رحيم وهذا جار وهذا صديق ماضيكم

ودائم كده يا جدة عمار
بالزوار والعمار
وعند النقلي حلاوة الحج
ويصلوا العصر في المعمار
وعند الشافعي تلقي
نسيم من ريحة الاحباب

ومئات السنين تبقي
من عهد سيدنا الخطاب
وشقاوي يكد عشان يعتاش
وافندي يشتغل بمعاش
ويوم الجمعة يتلاقوا
بكل الحب عند عكاش

وابوعنبة وللهنود قصبة
ومسجد للموحد يطل
ومنارة مائلة عجبة
وفيه ومنه كمال العدل
مساجد اسمها عالي
تجمع أهل مع خلان
اسأل ربنا الوالي
يبلغنا بخير رمضان

وقبل الختام – ومسك الكلام
يقول لسان حالنا
يااااا جدة – تصدقي ولا احلف لك – عجزت بلساني اوصفلك
نعيم الحب في وصلك – وانت كريمة من اصلك
وشوفي قلبي علي يدي – وهو اغلي ما عندي
وتبغي زيادة في حبك – اجيبلك قلب ثاني منين

لكن : قالوها في الامثال
وقالوها رجال ثقال
بأنك أنت يا جدة
أمنا في رخا وشدة
قبل الختام
عز الله المملكة – ووفق مليكنا سلمان في كل طريق يسلكه
ويحفظ ابطالنا في الحد – وينصرهم في المعركة
وختامها يا كبار الدار – صلوا عالنبي المختار – محمد سيد ولد ادم – وشفيعنا لدي الستار
تأليف الكلمات / منير صالح السيد حسن