شعر-عبدالله الطلحي
ياهل الشعبي من الشعر وارباب الفصيح
من يوردنا على منبع العد القراح
القصيد إحساس وشعور من قلبٍ جريح
لاتجيني تشكي الضيق في حزمٍ براح
لاإجتمع قلبٍ يعاني وقلبٍ مستريح
من يجاوب لاعي الورق ويلج الصياح
كان ماجربت من عالي القمه تطيح
لاتحاول توصف شعور غيرك يوم طاح
السجين يمني النفس بالجو الفسيح
والمريض مناه يمشي مع الناس الصحاح
والرشا مايتعب إلا يدين اللي يميح
انشد اللي ورد الذود مطوية رماح
والمحبة ما تهيا لقلبٍ من صفيح
ما تطيّر غير قلبٍ معه ريش وجناح
ويابس الأغصان ما تنثني مع كل ريح
والغصون الخضر ترقص على عزف الرياح
والربابة كان مالاعبوها ما تصيح
وكان ماشبيت في العود ما دخن وفاح
من عرض دعواه بشهودها قلنا صحيح
ومن يبا يمزح نحيله على باب المزاح
ليت للإبداع بابٍ عليه امرٍ صريح
من قراه اما دخل معه وإلا اقفى وراح
خل ميدان القصايد لمن صدره يفيح
وخل ميدان المعارك لمن يحمل سلاح
