الله يجازي الشوق

شعر- العنود سعود
تشاركنا لاول مرة الشاعرة العنود سعود من الشقيقة (قطر) من خلال هذا النص(الله يجازي الشوق) والذي سوف يتغنى به الفنان يوسف العلي قريبا حيث تقول:
اشتقت لك مدري شسوي بشعوري
وشلون بتحمل حياتي بدونك
غيرك إذا ماشفته ماهو ضروري
إلا انت ياللي قاتلتني عيونك
متى اللقا يسقي بشوفك زهوري
متى بتمطر ياغلاي بمزونك
واخلط عطورك مع بقايا عطوري
واذوَّب اشجاني برقة شجونك
والمك بحضني وتبرى كسوري
تجبر ضلوع اللي بدمه يصونك
الله يجازي الشوق كدر سروري
حرك لهيبي والمشاعر يبونك
أصيح بغيابك والملم حضوري
أجلس مع الذكرى وأسافر لكونك
أسرح مع الأوهام وابني قصوري
أتخيلك عندي برسمك ولونك
واصحى ويعصفني الألم من جذوري
يصرخ بي الواقع:ذبحني جنونك!