لوحة تشكيلية !

شعر- سعودالصاعدي
جيت انسج لفجر الليالـي وشاحـه
وارسم بكفّ الصبر بـابٍ ومفتـاح
واهزّ كتف الليل واطـرح رماحـه
وانقش على كفّ البحر قلب مـلاح
لجل الضرير اللـي مضيّـع صباحـه
و لجل الغريب اللي فقد طعم الارواح
شبّيت ضـوّ ولا فـعينـي مساحـه
واسرجت خيل ولا معي عزم وسلاح
ورسمت في بالـي قيـود الصراحـةْ
فارس سجين ويشتعل معْـه مصبـاح
ولوّنت بحـري بالوفـا والسماحـةْ
واعتقت من صدري تماسيح واشباح
ورسمت طيرٍ فيـه تنـزف جراحـه
مكتوب في عزمه على ريش و جْناح :
يا طير عقبك مـن يصفّـق جناحـه
يا مدوّر الراحـةْ ولا انتـه بمرتـاح
ما عاد يبقـى فالصـدور انشراحـه
غطّت مواجعنا على كـلّ الافـراح
ولا عاد يبقى فـاخر الوقت راحـه
راح الفرح واللي يجيب الفـرح راح