الناس في رمضان

محمد احمد فلاته

وأنت ماشي بعد العصر في شوارع المدينة سواء كنت في العوالي أو قربان أو الحرة الغربية أو غيرها من الأحياء تمر بك – المحلات التجارية والبسطات في كل مكان واكتر شيء تشوفه السنبوسة والقطايف والكنافة والسوبيا ومو هذا المهم .. المهم انو على كثر البسطات تكتر المخاصمات إلا أحيانا تتعدى الشتم والصريخ والزعيق .. وتوصل لحد الضرب .. والاشتباك بالأيادي طبعا .. هذا كله في رمضان وقريب المغرب والناس صايمين ويقولوا بعضهم .. إنوا الصيام يوتر الأعصاب وإنوا الجوع ما يخلي الواحد يعرف يتصرف .. والحقيقة إنوا الصيام يهذب الأخلاق .. نرجع لموضوعنا
وأين هي الأسباب إما هذا سكر على سيارة هذا .. ولا هذا مستعجل ورفع صوت البوري ويأشر بيده .. تشوف شفايفوا تتحرك من خلف قزاز السيارة .. طبعا ما بيذكر الله .. أخونا وحبيبنا .. قاعد يسب ويشتم ويلعلع .. ولا هذا يبغى يأخذ سرى هذا في الشريك أو الفول أو السوبيا .. وكلمة من هذا وكلمة من هادا وتصير البقعة إللي تبدأ باللسان وتنتهي بالأيدي .
وأنا أقول لحبايبنا .. متى نتعلم الصبر وضبط الأعصاب والكلمة الطيبة وخاصة في هذا الشهر وإحنا صايمين .. وقد علمنا رسولنا الكريم صلي الله علية وسلم وقال ( فإذا كان يوم صوم أحدكم فلا يرفث ولا يصخب فإن سابه احد أو قاتله فليقل إني صائم ) .. يعني إذا سبك او شتمك أو جهل عليك أحد فعديها .. وقول اللهم إني صائم .. رمضان كريم .