شعر: فحيمان الحجوري
ياعيال شوفوني ليا جيت ابا أقوم
عندي ثقل ومحاولة للمقامي
تذكر علي علوم واضيع علوم
والوزن خف وباقيات العظامي
ليه (مطالب) كل واحد بمرسوم
خمسه مطالب كاملة بالتمامي
الاوله بالفرض له وقت معلوم
من يكمل فروضه رفيع الوسامي
والضيف بالواجب معزز ومحشوم
يلقا الكرامه في بيوت الكرامي
والسيف ماودي تبين به ثلوم
لاقامت العالم تعد الاسامي
وكثر الكلام يكون به شي مسموم
من ميزت الرجال وزن الكلامي
والصدق في ميدان حاكم ومحكوم
حاكم ويفصل بين مرمي ورامي
اخذ الحذر واجب وماكان مقسوم
والصمت حكمه والنميمة حرامي
مافيه مخلوقآ من الناس معصوم
غير الرسول اللي عليه السلامي
