رصد – هليل المزيني
تفاعل الشاعر الكبير لافي بن حمود الغيداني مع مشهد إقتحام فتاة لمسرح سوق عكاظ بمحافظة الطائف قبل عدة أيام وما اثير حولها من جدل ومزاعم متعددة حيث غرد عبر حسابه بتويتر مفندا ماحصل من خلال عدة أبيات شعرية جميلة جسدت رؤيته الحكيمة تجاه الحدث وحظيت بتفاعل ومجاراة العديد من الشعراء لها وندعوكم لتشاركونا قراءتها ومانتج عنها من ردود متباينه كانت على النحو التالي:
لافي حمود:
ماتلحق الشكه بنات الرياجيل
لو الزمان وكل شي يتغيّر
مثل النجوم المرقبه فوق بالحيل
تنشاف لكن من بغاها تحيّر
المحصنات المترفات القناديل
ماهن جلايب سوق طب وتخيّر
بنت الشرف ماتقبل الهون والميل
ولا تقبل ابوها .. وأخوها .. يعيّر
محمد حوقان:
ماعاد فيه رجال في بعض هالجيل
اخذ الكلام الصح ماهو تطيّر
نعم وهم قلّة جنوط وزنابيل
تقودهم نور وسعاد ونويّر
بعض البنات تشوف منها تهاويل
يبغا لها رجال ملعون خيّر
لا شفت بعض تصرفات المهابيل
احزن على حال الضعيف المسيّر
عبدالعزيز الحنيني:
صدقت يابو حمود في كل ماقيل
اخترت مايكسب رضا كل خيّر
مثل ماقلت الخير باقي بهالجيل
ولايمثّل اخلاق الكبار الصغيّر
عزاوي اللي كل ماركبو الخيل
يثنون دون مدرّجات الحويّر
عاشن على عز وكرامة وتبجيل
ماهن بصيده هيّنه للمطيّر
عبدالله يحى ابوشامة:
بنت الرجال اللي بها يقتدي جيل
ماهي على درب الرذيلة تسيّر
والله لو جانا زمان التهاويل
لبنت الوطن صدر العفاف يتجيّر
ماهمّها لو يكثرن الأقاويل
ماهي من اللي بالعجاجه تطيّر
ولا هي من اللي يلبسن الخلاخيل
وعن المفاتن عندها عقل نيّر
محمد الحافي:
ي لافي الأوضاع تحتاج؟؟ تحليل
و ( الطايف المانــوس عيا يضيَّر )
ثاني سنه؟؟؟ ( يمِّه تمَّد ) الدرابيل
يدري بها من جاء؟ مصيفه و سيَّر
واللي حصل بعكاظ مسرح وتمثيل
البنت هذي تحــت شيك(ن. مجيَّر
ماترتبط بـ إسم الرجال الحلاحيل
بنت القبيله !! مثل ريم(ن. مذيَّر
محمد القريشي:
اللي يجر الصوت راع المواويل
ليته عن المنبر بسرعه يطير
بنت الحمايل ماتضم الرياجيل
تلقا بها عرقن لحقها صغيّر
شفنا شداد الوقت ياخوك به ميل
والوقت خلا كل شي يحيّر
بنت الصحا ماهيب بنت المهابيل
مثل الجدي تحت السما مايسيّر
بدر الهبيري:
بنت الحموله ما عليها مداخيل
لو عاف حشمتها وجيه المطيّر..!؟
حطولها مع كل طرقه محابيل
حتى مع الخط السريع المقيّر
ولا فاد معها ..ثابته..درّة الجيل
ما ابطا خبيث الراي ما زاد خيّر
كن القدر يتلي عليها تراتيل..!؟
صوب الحيا مودع قدمها مسيّر