شعر- محمد الذرعي
يا غريرٍ ضعت في جهل السلوم
ما تميّز دقّها واجلالها
لا تشب النار في شنّ الهجوم
واللكاعة لا تشد حبالها
الله الدايم وغيره ما يدوم
والقوافل ساقها جمّالها
جعل بيتٍ دونه الظل ..مهدوم
قلتها مبطي .. وغيري قالها
لا تحرّف بالكلام وبالعلوم
كم علومٍ طوّحت برجالها
(الأصيلة) .. تنفعك عند اللزوم
و(الرديّه) .. من ردى خيّالها
يا الهبيل اللي تخمّشت النجوم
حالتك حالة (غبا) يرثى لها
و(النِعم) صعبه على حظ الرخوم
كلمةٍ ما كل رجلٍ نالها
المراجل بالتفاوت بالعزوم
والنشاما قولها مْن أفعالها
والطيور اللي على(الفضله) تحوم
وقّعت بالقاع فوق أشكالها
وعيبك اللي ساتره تحت الهدوم
واضحٍ كالشمس وقت إقبالها
زلّتك ما تدمح بحب الخشوم
وغلطتك كبر الزمان لحالها