شعر: صالح الرشيدي
مايطرد عماس الهواجيس طـاروق
ان ماصـدح بمهيـلـه عندليـبـه
وأنقاد له معلوق وأنسـاق معلـوق
وأمست مساجين الضلـوع تحديبـه
الشعر سهله صعب وطروقه طروق
ماكل مـن مـس النجيبـه يجيبـه
هذا الصحيح وكل مطرود ملحـوق
بـذت حناجـر مخطياتـه مصيبـه
غيم التمني ماسقـا قلـب وعـروق
أخـو السـراب ومايعيبـه يعيبـه
ياالعسوجية. قـد والعنـق منتـوق
والعسجدي يلفـح ويومـي سبيبـه
ميلي بجيد متولعـه ميلـة عـذوق
ينقـاد لـه متولـعـه وأنتحيـبـه
سيري مثل سير أدهم المزن برفوق
وأدني مثل قرص الشفق في مغيبـه
واردي على عد الروى وأرتوي ذوق
مـن سـوق تيـار القـراح لقليبـه
وأرقي على ضلع الغلا وأستوي فوق
كرسي مسجون الضلـوع أستويبـه
أنتي عزاوي قوم وحقوقهـا حقـوق
في ضعف ماينبـاع بـه تشتريبـه
أمـا كــذا وإلا فلاتوردالـنـوق
هي هكذا واللـي فـلا وش نبيبـه
