شعر- احمد السديري
من يدخل الجنة ومن يدخل النار
هذا الحديث اللي بقى مانقوله
احدٍ ليا اخطى ذاع صيته بالاخبار
واحدٍ ليا اخطى ماقدرنا نطوله
والطيّبه بالقوم صارت كما العار
ماتنسمع في وقتنا من ذبوله
البارحه قامت تلاعبي افكار
وافكار ماهي تنّسي في سهوله
الى متى والوقت محتاج له بار
يدمح خطأ من خالفه في ميوله
نخطي مع الناصح ونخطي مع الجار
ونصالح اللي ماخدمتنا فعوله
وان كان ماتقدر على حفظ الاسرار
اللي يحاك بصدرك احذر تقوله
دام العمل للواحد النافع الضار
اكبر حصيلة فوز واكبر بطوله
واخير من ذكر البشر حفظ الاذكار
ياحظ من هو طيّب الهرج قوله
