شعر: عويد المطرفي
ياخالق الدنيا ويافارض الدين
يامحدد أرزاق الخلايق وأجلها
تفتح لنا باب عليه الكوالين
وأنك تصون نفوسنا عن زللها
اليوم أحس أني (طليق الجناحين)
صقر خطب ود النجوم ووصلها
أوفيت راع الدين ماعاد له دين
اليوم سلمت الأمانة لأهلها
وطلعت مطلاع الحرار الشياهين
اللي ينومس عند أهلها عملها
نظيف جيب ومبعدن عني الشين
ولا كل من هاز الأمانة حملها
منول اسمي منحصر بين قوسين
وعوضني الله بالوناسة بدلها
آجي وأروح مع القروم الحشيمين
لا أشكي من الربطة ولا أحسب زملها
حرية(ن) ماتنشرى بالملايين
تبعد عن النفس الملولة مللها
ماجربوها أهل الطمع والمشاحين
اللي تصر ريالها مع هللها!!
