شعر:عبدالله بن جملا
يالله بسقيا العذب لاسقيا عذاب
انشودةٍ تنساب مابين اضلعي
تنساب مابين الشرايين انسياب
وتحط لهمومي مخدر موضعي
رحمة تنزل من طرف هدب السحاب
تمطر علي ولا تفارق مسمعي
نغمة تسوي في المفاهيم انقلاب
وتوسع آفاق الأديب الألمعي
من مغتسل بارد ومن رشفة شراب
المنبع اللي منه يصفي منبعي
احيان مخلوطة من الما والسراب
واحيان من خيرات ياأرض اقلعي
تجبرني اسمع وانتشي واجبر مصاب
واستحضرالمهجور واهجر مضجعي
من شان لا يحصل تخلخل واضطراب
ومصالحة مابين اذني واصبعي
ياالعذب (صوتك سحر)ضد الاكتئاب
معزوفه من الوعي ومن اللاوعي
يفتح على قصر الفرح تسعين باب
ويقول ياشمس المواعيد اسطعي
فيه السرور وفيه شي من العتاب
ياصابر استبشر ويا نفس اقنعي
ياخذ خيالي فيه سجة وانتداب
رحلة مكوكية تنسيه وجعي
رحلة تذاكرها ذهاب بلا اياب
نحو الغد المشرق واقضيها معي
واسري معك واتذكر ايام الشباب
وانهل من الصافي وتنهل ادمعي
اليا انتقلت من القرار ليا الجواب
ياذايقة مدي عروقك واشبعي
الفكر حاضر معك ومسجل غياب
محتار مدري كيف احدد موقعي
انا اشهد ان متابعك عين الصواب
وان التشبع منك غاية مطمعي
وان الهقاوي فيك ماتحسب حساب
ولا تصدق فيك دعوة مدعي
