شعراء وشاعرات الوطن يتغنون بذكرى توحيده

البلاد – هليل المزيني

ياوطني….ياوطن الغيم
حبك(يسرقني)من الضيم
لاضاقت في قلبي(الونه)
ياأخضرمن شجر(الجنه)

ياكفّ منقوش (بحنه)
ياورد(نشمك)وإنهيم
ياأكبر من (فكر)إرهابي
ياأحلى كلمة بكتابي

ياسجدة حب بمحرابي
يامهبط قرآن وسنه !!.

الشاعر عويد المطرفي(بعيد الهقاوي):

اليوم عيد وكل يوم لنا عيد
يوم الوطن فرحه وذكرى عظيمه
يوم نعمره بالدعاء والزغاريد
ندعي لأبو تركي قوي الشكيمه

الشاعر مطر الروقي:
سعودي وطبعي بفضل الله نزيه
ولنا الفخر في اطهر ثرى واشرف بلد

الدين فيه الامن فيه الخير فيه
وفي ظل ربي ثم ظل ابو فهد

الشاعر فيصل المهلكي:

فديت راسك..يا وطن
افخر مثل ناسك..وغن
الروح ملكك..والولد
والله احد

مايدنّس ترابك .. اجير
حنّا مقابيس الوغى
حنّا جحيم اللي بغى
نمشي على الدرب .. الكسير

ولا نحتمي بغيرك .. وطن
الشاعرة تهاني بن جريس:
من يجهل التاريخ خطواته قصار
يلهث ولا يلحق مدى الدرب الطويل

الملك لله ثم لآل سعود صار
عهدٍ نشيله كلما الذكرى تخيل

الشاعرة نوال الحربي(الخنساء الصغيرة):

‏السعودي يفتخر بالدين ثم انه سعودي
يشكر المولى على التوحيد وتراب الجزيرة

مايشكك في محبتنا منافق او يهودي
الوطن غالي بعين الشعب ماتسواه ديره

الشاعرة(ونه):

‏ياموطني دام الوفا والغلا دام
‏محبتك تمطر على الروح ديمه
‏انت شعار الدين وبلاد الاسلام
‏دايم على شرع الولي مستقيمة

الشاعرة نور الوليدي:

عيدي الوطن كل العمر داخله عيد
عيد السعوديه عسى الله يديمه
مبني على خيرومحبه وتوحيد
ياقبـلةٍ من فضل ربي عظيمه

الشاعرة تاج الغرور:

عيد الوطن شعب يحب القياده
حب طغى ماهو مجرد شعارات
عيد الوطن جندي يحب الشهاده
وهذا جنوب المملكة شاهد اثبات

الشاعرعبدالكريم بن خزيم:

يادارنا دار الكرم
دار العداله والحرم
واخوان نوره دونها
منهو نصاهم مايضام

الشاعر سعد الشليل:
واحد الميزان يايوم الوطن
للسعوديين له ذكرى وشأن
منحفر في الذاكرة عبر الزمن
ترمز لدولة سلام ورمز أمان