راحت عليك

شعر: عبير أحمد

خلاص راحت عليك .. وراحت أيامك
والحب راحت به الأيـام من دونــك
يا قلب صحصح.. زمـن وآبشرّك .. ضامك
إلحق جروحك قبل تستفحل طعونك

لو ما ظلام الليالي حسّ بالآمك
ما كان شفناه صابغ وجهه بـ لونك
حذرتك اْمن المسا .. واهديـته احلامك …؟
أو تحسب انـّـه سهر لك لأســود عيونك ؟!

وقتٍ يخونك به الرجـّـال قدّامـك
ظـنــّـك سفيهه .. إلى قفــّيت بيصونك ؟
اللي حكى لك .. بيحكي فيك لأقلامـك
حتى اقرب الحبْر يا مسكين بيخونـك !!

ما يكفي اْمن الحبايب جـفـّـت عظامك…
للحين ترجي من الحسـِّـاد يسقونك …؟!
الطيب ذنبك .. وعيبك طاهر اسلامك
ومع كل هذا.. تبي بالخير يطرونك !!

يا قلب يكفي حراااام تقطــِّع ابهامك
كل ٍ له الله .. و كـــان الله في عونك
اليوم ميلاد موتك.. وفــِّر اعوامك
وان شاع ذِكـْرك مصير الناس ينسونك

خلاص راحت عليك .. وراحت أيامك
والحب راح ورجع لي بسّ .. من دونــك