شعر: محمد الفالح
جرح الخيانه عميق وتذبح طعونه
والصد والبعد منك ظلم وخيانه
الشخص مايبحثون الناس مكنونه
الا ليا بيح المكنون بلسانه
وانا عشقت الحبيب ونامت عيونه
واليوم دمعة عيونه تسقي اوجانه
كنت الوليف القريب وخابت ظنونه
وكنت الحبيب الغريب وعاد لاوطانه
عطيتك الورد لكن مااختلف لونه
كن الهبوب الشمالي يطرق اغصانه
سجنتني والقلوب تموت مغبونه
والطير رغم العذاب يحب سجانه
تركت حبل الهوى للي يودونه
واقفيت نفسي من اللي فات ندمانه
انا ماقول الكلام الي تقولونه
ولااقتنع في كلام فلان وفلانه
وشلون لاحبته تنساه وتخونه
انسان وشلون يقدر يجرح انسانه؟.
