شعر: حامد الحمراني
قال (الوداع) وقلت بدري علينا
حلمٍ يموت و ماوصل للحقيقه
وصلك عقب فرقاك صعبٍ يحينا
محال نتّلاقى بأية طريقه
من قبل لانبدا الوصال انتهينا
قربٍ حصل بس التجافي يعيقه
مايرسي المركب ابد دون مينا
والقلب مايتبع هوى مايطيقه
الود مايمحيه طول السنينا
والورد ماينسى شذاه و رحيقه
والعين لو شافت يسار ويمينا
ماأحدٍ يسد بمنزله في الخليقه
ياما عطينا بالوفا ولاخذينا
الود صادق والمشاعر رقيقه
لون الحزن لونبتسم بان فينا
والنفس في بحر المآسي غريقه
حان الفراق وبعدها ماسلينا
وماغاب طيفه عن خيالي دقيقه
عن الهوى ياليتنا مادرينا
ولا مشينا بطوعنا في طريقه
