شعر: عبدالرحمن فهد بن دايل
نجم الجدي وسهيل قام ايتهايق
طاب السمر والليل ما طاب ويّاك
برّد على قلبك فلا نيب ضايق
ما همّني هذا ولا همنّي ذاك
نوفي ولو تجحد جميع الخلايق
ذي عادة فينا ولاهيب تخفاك
والعمر محسوبه عليه الدقايق
يا الله عساني عامر الوقت برضاك
وإلا معاشر موقدين الحرايق
ما تنفع توديك في درب الادراك
خلّك نظيف القلب ما به علايق
وإن إوجعك طعنة عزيزٍ تبلاّك
أصبر تحمّل لا تزيد الشقايق
ياسرع ما يرجع وبالعذر يبداك
والوقت مثل الناس لا جاك رايق
فاغنم وحقق ما تريده ليا جاك
وإن ضاق بك صارت دروبه غلايق
بأدنى الخساير سايره وايتعدّاك
و(إياك تشمت) في ضعيفٍ وعايق
ارفع يدينك شاكرٍ خير مولاك
تراك ما تدري على وين سايق
أقدام رجلك والصواديف تبراك
واستر ولا تتبع سفيهٍ يوايق
خلّك على ستر المخاليق مسعاك
وابذل ولا تخشى من الوقت ضايق
الله كفيل الرزق من قبل منشاك
كوده بيومٍ قمطرير ٍ وحايق
ينجيّك ربي من جحيمه وياقاك
والدنيا كانك من يريد الحقايق
ما تسوى قولت (شفت ذولا وذولاك)
ترى الغنيمة يوم بيض الوثايق
بالأخرة توضي بها كف يمناك
