فواتير
ما عاد للأحلام فـ العمر تأثير
ولا يحققها العمر بـ التقادم
حياتنا صارت مجرد (فواتير)
سدّد .. عشان تعيش مثل الأوادم
وإن كان ما سدّدت لا تنتظر خير !
بتعيش طول العمر للفقر خادم
لا واهنيّك بالفضا يا العصافير
بالعولمة .. ما قد حصل لك تصادم
زايد الرويس
صمت وقهر
وحدك وفي ظن الليالي وحدك تعيش الشتات
نفس الرؤى ما فارقت ماضيك من بدّ العمر
ظلمه مخاوفك القديمه تستفيق من السبات
ونرجع لسالفة القصيده يوم كانت تحتضر
وتقول وينك دثريني ما بقى فيني حياة
اقري على قلبي حضورك وافتح كتاب الشعر
من يسمعك؟ وانت الوحيد اللي معك وسط الرفاة
مافيه غيرك يحتضنك ويعتصر (صمت وقهر)
وأنا عبرت المستحيل وجيتلك فكرة نجاة
تلقا تفاصيلي تمرك مثل ما عمري يمر
إسراء عيسى