شعر: د.خضر اللحياني
من كثر ما احبه واهيم بمزاياه
وهو معي ياناس وأشتاق أشوفه
أشتاق لو تفقد عيوني محياه
ماودي الا بس أناظـر وصـوفه
ما أطيق أنا بعده ولا أطيق فرقاه
أبغى كفوفي ماسكه في كفوفه
هذا الذي كله بكامل حلاياه
اشوف أنا نفسي لياجيت اشوفه
عايش معي دايم وانا مقدر أسلاه
حتى وأنا في النوم أصادف طيوفه
ياكم يحرجني بكثرت هداياه
وياكم يسعدني بحرصه وخوفه
هذا اللي أنا فيه كل شي(ن) القاه
الحب والطيبه صفات إمعروفه
حبيبي احبه واداريه واهواه
وأحب الأسماء اللي توافق حروفه
سبحان رب(ن) بأكمل الزين حلاه
عيوب خلق الله تمر وتطوفه
جمر الغضا كنه يشابه شفاياه
وكن الحسن ماخذ لزينه بروفه
أغيب واضمه على قلب يرعاه
وأشعر شعور إني معه وسط جوفه
ياالله ياربي تديمه وترعاه
ويبقى معي دائم وعيني تشوفه
