شعر: دارين
معقول ما اشتقت لي يامطول الغيبه
وشلون ما هزك الشوق لملاقاتي
لعبت دور الجفا و اتقنت اساليبه
والا تبي تختبر وش كثره احاتي
لا ياخذك فالمحبة شك و ريبه
على النقا والوفا ابني علاقاتي
تنساق لك لهفتي بالود و الطيبه
ولا غيّر صدودك الحالي قناعاتي
وإن جار وقتي ودارت بي دواليبه
آجيك . مايوم خابت فيك هقواتي
وإن كان قلبك قسى وأظهر عذاريبه
لعيونك أذبح ظنون تشب شرهاتي
وغن كنت خايف من الحق ومطاليبه
أسقطت فكرة ( عتابك ) من حساباتي
وغن كنت هارب من الحب و لواهيبه
ماني على أسوار قلبك فارضه ذاتي
وإن كنت مرتاح في وضعك وراضي به
تدور الأيام .. و تحس بمعاناتي
والله يبليك بإحساس بلاني به
لأبطيت من عقب روحاتي وجيّاتي
وتصيح مشتاق لك يا مطول الغيبه
وشلون (ما هزك الشوق) لملاقاتي ؟..
