شعر: سعد بن مسفر الشمراني
دن (راعد هاجسي)وأرتاع من جفني نعاسه
قال ياكثر الغيوم وحلها صافي مطرها
اوشكت لحظاتنا والوقت طال وزاد باسه
نحتري ما نحتري والروح متعبها قدرها
كم ذبل فالجو نجم وكم كفو قد شاب راسه
وإرتفاعات العوالي ما تساوي منحدرها
لا وزنت القاع والقمه بطلعه وإنتكاسه
ما رظا عينك منام ولا نفع فيها سهرها
جس نبظك واحرص إن الظغط يبقى في مقاسه
حالتك لا صرت ثاير وإنفعالي في خطرها
أسمع أيامك وهي تحكي وخذ منها دراسه
وإحتكم للحق وأهل العقل وأنهل من بحرها
خل كل الناس تسمع من درر حسك وماسه
في برود الصمت لايجمد في اشجارك ثمرها
إنتعش ياقلب بوتركي بلحظات الوناسه
والحدايق في ربيع الشوق لا يذبل زهرها
لا يهمك ما يصير ولا يشوف القلب ياسه
لو بكى قوس الربابه وادمعت نغمة وترها
غيرك أنكاله كثير وشارب العلقم بكاسه
دام فالدنيا مزارق طيب لا تقطع أثرها
