شعر: مريم الأحمدي
جرح المحبة في وسط خافقي صاب
ويا حزن قلبي فـ الليال الطويلة
القلب ضاعت هقوته والشَعر شاب
مدري من اللي فيه شب الفتيلة
ما عاد به وسط الحشى لوم وعتاب
والعين صارت بالمدامع كحيله
عايش مع الاحزان خايف ومرتاب
والوادي ابطى من منابع مسيله
بكيت من حر الزمن قرب واغراب
يوم الدموع ابلغ معانِ الفضيلة
ما مر بالي زيف وشعور كذاب
قلبي دليلي والمشاعر دليله
يطري علي مسببٍ كل الاتعاب
واشوف زوله وسط عيني واخيله
اللي عن دروب المحبين ما تاب
لجله حلفت احقق المستحيلة
وتقفلت دونه مغاليق الابواب
وانا على الأقدار ما فيّ حيله
شَقيت لجله كل صفحات ال..كتاب
وخليت صفحة ذكرياتي الجميلة
ما جيت له نادم ولا جيت طلاب
والله وكيلي مثل ما الله وكيله
مرت سنين وجرحنا ما بعد طاب
لا بارك الله في الحظوظ البخيلة
والله يوفق شامـخٍ رَوَح.. وغاب
( بيني وبينه: ديرتين.. وقبيلة)
